የኢትዮጵያ ቮሊቮል ፌዴሬሽን ከዓለም አቀፍ ቮሊቮል ፌዴሬሽን ጋር በመተባበር  በአራት ኪሎ የስፖርት ትምህርትና ስልጠና  ማእከል  ከመስከረም 24-28/2003 ዓ.ም ሲሰጥ የቆየው ስልጠና መሰረታዊ የቮሊቮል አሰልጣኝነት ላይ ያተኮረ ነው ፡፡ በጽሁፍና በተግባር ሲሰጥ የቆየው በዚሁ ስልጠና 30 የሚሆኑ ከብሔራዊ ቡድን ተጨዋቾች፣ ከክልሎችና ከተማ መስተዳድሮች የመጡ የታዳጊ ወጣቶች አሰልጣኞች እንዲሁም ተጫዋቾች የተውጣጡ ተሳታፊዎች ነበሩ ፡፡

አለም አቀፍ የኦሎምፒክ ኮሚቴ የመጀመሪያውን የወጣቶች ኦሎምፒያድ በሲንጋፖር አካሂዷል፡፡ በዚህም 153 አባል ሀገሮች 3,525 ስፖርተኞቻቸውን አሳትፈዋል፡፡ ለሁለት ሳምንት ሲካሄድ በሰነበተው ውድድር ሜዳሊያ ሰንጠረዥ ውስጥ የገቡት 27 ሀገሮች ብቻ ናቸው፡፡ ኢትዮጵያ በአትሌቲክስና በውሃ ዋና ያቀረበቻቸው ተተኪ ስፖርተኞች አኩሪ ውጤት በማስመዝገባቸው ከመንግሥትና ከኢትዮጵያ ኦሎምፒክ ኮሚቴ 200 ሺ ብር የማበረታቻ ሽልማት ተሰጥቷቸዋል፡፡

ነሐሴ 28/2002 ዓ.ም. ምሽት በሸራተን አዲስ ሆቴል ላሊበላ አዳራሽ በተካሄደው ሥነ ሥርዓት በ1000 ሜትር በሁለቱም ፆታዎች የወርቅ ሜዳሊያ ያስገኙት መሀመድ አማን እና ትዝታ ቦጋለ እያንዳንዳቸው የ45ሺ ብር፣በ3000 ሜትር ተሳትፎ የብር ሜዳሊያ ላጠለቀው ፍቀሩ ፈይሳ እንዲሁም በ2000 ሜትር መሰናክል የብር ሜዳልያ ባለቤት ለሆኑት ፀሐይነሽ ፃሌና ሀብታሙ ጃለታ እያንዳንዳቸው የ25 ሺ ብር ሽልማት ከጠቅላይ ሚኒስትር መለስ ዜናዊ እጅ ተቀብለዋል፡፡

በውሃ ዋና በ50 ሜትር ጀርባ ቀዘፋ በራስዋ ተይዞ የነበረውን የኢትዮጵያ ሪከርድ ላሻሻለችው ያኔት ስዩም እና ሮቤል ኪሮስ ለየግላቸው 9 ሺ ብር ተሸልመዋል፡፡ በሽልማቱ የአትሌቲክስ አሰልጣኝ ሻምበል እሸቱ ቱራ የውሃ ዋና አሰልጣኝ አቶ ጌታቸው ውበቱ እንዲሁም ቡድን መሪው አቶ ኪሮስ ነጋ ተሸላሚ ሆነዋል፡፡

የኢትዮጵያ ክብደት ማንሳትና የሰውነት መገንባት ፌዴሬሽን ከ1968 ዓ.ም. ጀምሮ የስፖርት ክፍል ውስጥ ተጠቃሎ የነበረ ሲሆን በ1970 ዓ.ም.  በፌዴሬሽን ደረጃ  ተቋቁሟል፡፡  በፌዴሬሽን ደረጃ ከተቋቋመ ጀምሮ በሀገራችን ስፖርቱን ለሁሉም የህብረተሰብ ክፍል ለማድረስ ፖሊሲዎችንና ስትራቴጂዎችን በመንደፍ ህዝባዊ አካሉን በማስተባበር አስፈላጊውን እገዛ በማድረግ በአገር አቀፉና በዓለም አቀፍ ውድድሮች ላይ በመሳተፉ አበረታች ውድድሮች ያደረገ ሲሆን እስከ አሁን ድረስ የታዳጊ ወጣቶች ስልጠና ኘሮጀክት የሌለው መሆኑ ይታወቃል፡፡

የቼስ ስፖርት በዓለም አቀፍ  በፌዴሬሽን ተቋቋመ ዘመናዊ እንቅሰቃሴ የጀመረው ከ1924 እ.ኤ.አ. ሲሆን በአገራችን ደግሞ በ1973 ዓ.ም. በፌዴሬሽን ደረጃ ተቋቁመው በ1986 ዓ.ም. የአለም አቀፍ የቼስ ፌዴሬሽን አባል ሆናለች፡፡ ስፖርቱ በሀገራችን  ከተጀመረ ረጅም ዓመታት ቢያስቆጥርም በተፈለገው መጠን አድገት አሳይቷል ለማለት አያስደፍርም፡፡ ስለዚህ  በአሁኑ ጊዜ ፌዴሬሽኑ ስፖርቱን ለማጠናከር ሰፊ እንቅስቃሴዎችን በማድረግ ላይ ይገኛል፡፡